RELAZIUN D’ATIVITÉ POR L’ANN 2020

L’ann 2020 é n ann particolar a gauja dla pandemia dl Covid-19. Porimpó á l’Uniun Ladins Val Badia dé n contribut fondametal por le svilup dl lingaz y dla cultura ladina. Ara á lauré fora n program che á plajü y é bonamënter sté ütl portan finamai n pü’ de ligrëza te tëmps nia saurisc. Impó éra jüda da porté a bun fin scialdi döt ci che l’uniun s’á tut dant - a pert les manifestaziuns. Ara ti é jüda incuntra ales esigënzes de döta la jënt dla valada y ti á dé espresciun a süa cultura te na manira dinamica y d’inovaziun. Insciö ti é l’Uniun Ladins Val Badia jüda do a sü obietifs y á ademplí sües finalités statutares cun gran pasciun, daidada dala convinziun che la situaziun atuala foss bindebó plü crödia zënza cultura. Le laur de volontariat di aconsiadusc y dles aconsiadësses dl’uniun, sciöche ince chël de d’atres porsones che á dé ca so tëmp y á lauré debann, é sté de gran valüta por la realisaziun dles publicaziuns, dles manifestaziuns y di proiec.
Fondamental por le bun garaté dl’ativité ampla dl’assoziaziun é sté le contribut finanziar da pert dl Assessorat por la Cultura Ladina dla Provinzia de Balsan, dla Regiun Autonoma Trentin-Südtirol, di Comuns dla Val Badia y dla Cassa Raiffeisen Val Badia.