N documentar sön la storia dl turism tla Val Badia
Werner Pescosta é l'autur dl documentar dé fora Uniun Ladins Val Badia, presenté en jöbia ai 24 de November a Calfosch
 

La Uniun Ladins Val Badia á presenté en jöbia ai 24 de novëmber a Calfosch tla ciasa Tita Altonle documentar video sön la storia dl turism tla Val Badia de Werner Pescosta. 

Le paisc da Calfosch, chirí fora por la presentaziun nia a caje, pó gní conscidré n pü’ la cöna dl turism tla Val Badia y Tita Alton instës á albü na pert fondamentala por le mëteman dl turism. Te chësc contest án insciö orü presenté le documentar video de Werner Pescosta, n’opera preziosa che dëida ti jí do a n svilup che tröc ne conësc nia y che n valgügn pioniers dl turism o descendënc de chisc cunta y descrí tles tröpes intervistes. 

Le presidënt Michael Moling á recordé che l’Uniun á albü na gran motivaziun da sostigní y dé fora chësc documentar deache la storia cun sües microstories é n patrimone important por la jënt y dëida capí le presënt y proieté damí le dagní. L’Uniun Ladins Val Badia ne se dá nia ma jö cun le lingaz mo plü en general cun la cultura tla Val Badia y la storia é sambëgn na pert fondamentala. Sciöche le presidënt á ciamó recordé, ó l’Uniun dialoghé cun i seturs desvalis y la jënt dla Val Badia y dé n contribut concret por renforzé la cosciënza sön nosc teritore cun süa storia passada, atuala y dl dagní. 

Werner Pescosta é l’autur dl documentar sciöche ince de ”La storia dei ladini delle Dolomiti”, dada fora te döes ediziuns y te na ediziun todëscia ”Die Geschichte der Dolomitenladiner”, da pert dl Istitut Ladin Micurá de Rü. Al á na gran pasciun por la storia, y en particolar por chëra dl post, y danter i tröc capitui fondamentai che fej fora chësta él sambëgn ince la storia dl turism. Mo sciöche Werner Pescosta dij, fossel ince chiló tröpes microstories dassënn interessantes da podëi cunté y inrescí do a funz. Tl documentar pón odëi la contrada dolomitica unica y imprescionanta, che é stada fontana d’atraziun sides por i pröms turisć co por chi d’aldedaincö, amesa chëra che al é gnü fat sö daimproia strotöres y lifc che ti pita aldedaincö al sciore na gran cualité di sorvisc che plüdadî ne podôn gnanca s’imaginé. Sciöche ara ê plüdadî vëgnel ince cunté y mostré tres intervistes y fotografies y chëstes testemonianzes dëida ciafé na prospetiva plü ampla sön le turism y sön les prospetives por le dagní. Por l’ocajiun dla presentaziun án orü mëte a jí na mësa torona cun deplü rapresentanc dl turism de seturs coliá, da döta la Val Badia, por aldí deplü punc d’odüda desvalis y por fá gní a löm n valgönes reflesciuns o problematiches atuales. La mësa torona é gnüda menada da Diego Clara, che á salpü da jí ite sön i ciamps d’interes di partezipanc y sön i aspec plü cialc. Danter i mëmbri che á dé so contribut a na discusciun plajora y interessanta orunse rengrazié Nicol Alberti, Oskar Alfreider, Felix Dapoz, Fortunato Flatscher, Ernesto Kastlunger, Renata Kostner. Le documentar video pón cumpré tl Istitut Ladin Micurá de Rü o sön le bookshop on-line, al prisc de 10 euro.

A i 17 de messel 2016 él vegnú festejé sun Jouf dl Sela i 70 agn da la gran enconteda di ladins. Gran defileda, benediscion dl monument nuef y detlarazion dla Generela en gaujion dla reforma dl Statut d’Autonomia dla Region Trentin-Südtirol.

La data di 17 de messel 2016 pón begn definí na data storica. Per man dla Union Generela di Ladins dla Dolomites él vegnú recordé sun Jouf dl Sela i 70 agn da la gran enconteda di ladins l ann 1946. Per chest di él sté trueps momenc emportanc. La festa á metú man con na gran defileda da la Utia Salei demez enfin ju Ciavazes, a chela che al á tout pert encer 40 lies dles cin’ valedes ladines, endut chi 700 partezipanc. Dedó él vegnú descurí a Ciavazes l monument nuef di ladins dla Dolomites, che é segn da vedei polito da streda demez. Do l sonn dl Inn Ladin da pert de dutes les mujighes partezipantes, á l digan sign. Vijo Pitscheider zelebré na messa ladina acompagneda da la Mujiga de Sëlva y dedó éson passés a i discursc ofiziai. Te chesta ocajion á la Generela prejenté n codejel per i 70 agn da la gran enconteda - curé da la redadoura d’La Usc di Ladins Giulia Tasser da Col Santa Lizia. Laite giaten deplu momenc storics di ladins, testemonianzes de jent che ova tout pert a la enconteda dl 1946, sciche ence - chest é de gran valuta - la declarazion dla Union Generela di Ladins dla Dolomites - per na politica ladina unida en gaujiun dla reforma dl Statut de Autonomia dla Region Trentin - Südtirol, tegnon cont di ladins dles provinzies de Bulsan, de Trent, ma ence de Belun. La declarazion é vegnuda auzeda fora da la presidenta dla Generela Milva Mussner. Truepes les autorités politiches y cultureles che á tout pert a la enconteda (articul fora dla usc di ladins). 

Iluminaziun dl Grup dl Sela in ocajiun dla Gran Incuntada di Ladins.

N gran dilan a dötes les Lies da Munt dles 5 valades ladines!
N gran dilan a sü presidënc Tullio Mussner, Fortunato Flatscher y Christof Agreiter, Paola Valle, Licia Fave y Diego Grones y a düc i volontars che á daidé para!
Organisaziun: Union Generela Ladins dles Dolomites

Festival dla ciantia Ladina,  Badia ai 28 de má 2016 'ciasa J.B. Runcher

Cinch cors, deplú ciantautours ladins y un dal Grijon, y grups de mujiga pop-rock da les vals ladines s'á abiné a Badia per na edizion danter tradizion y inovazion (articul fora dla usc di ladins).