Pröm capitul: Ci ch’ara ô – Ci ch’ara se tol dant de fà – Olâ che ara sta.

Art. 1  La Uniun di Ladins, seziun Val Badia, é na assoziaziun che ô mëte al sigü y vardè i problems y i interèsc ladins. Por le plü ciarera da trà sö na cosciënza ladina cun daidé, fà maiù y defëne nosc lingaz, nosta cultura, nostes usanzes y tradiziuns. La Uniun se prô ince por laurè deboriada y adöm cun düc i Ladins.

Art. 2  La Uniun di Ladins dla Val Badia n’à daldöt nia da fà cun la politica.

Art. 3  La Uniun à so scagn a Badia.

Art. 4  Tla Uniun di Ladins pò se lascè scrì ite düc i Ladins, chi co é gnüs Ladins, i mituns de geniturs ladins, ince sce ai sta foradecà, y chi che s’à fat y se fej mirit por la gauja ladina.

Secundo capitel: Cô éra pa organisada?

Art. 5  La Uniun vëgn manajada da n consëi metü adöm da önesc porsones, danter chëstes n presidënt y diesc aconsiadus.

Le presidënt vëgn metü tla sentada de düc i scric ite, do le numer dles usc.
Le presidënt se chir fora danter i aconsiadus n secretêr y n cassier.
Le vize-presidënt vegn metü dal Consëi, cun plü de meses les usc.
Le Consëi vêl por dui agn.

Art. 6  Le presidënt raprejentëia de vigne vers la Uniun dant ad atres assoziaziuns.

Art. 7  En cajo che le presidënt mancia, él le vize-presidënt che surantôl sües funziuns.

Art. 8  La sentada de düc i scric ite vëgn cherdada adöm dal presidënt almanco n iade al ann y ince vigne iade che la presidënza o la terza pert di scric ite le arata debojëgn. 
La sentada di scric ite da dant les maius lignes dal program de laûr, ara scuta sö i laûrs da l’ann che é stè y de chël che arà da gnì, porta dant y bele aprovà dal Consëi. Ara nominëia trëi porsones che ciara do plü avisa ai cunc.
La sentada vëgn cherdada ite vign’ann de setëmber.

Art. 9  La Uniun fej sü laûrs cun scioldi trac ite dales iscriziuns, cun contribut da pert dla Uniun Generela di Ladins, dla Regiun, dla Provinzia, dai Comuns y da d’atri Enc.

Terzo capitel: Ci ch’i scric ite pò y ci ch’ai mëss.

Art. 10  Düc i scric ite à chisc dërc:
a) ai tol pert ales riuniuns y a dötes les iniziatives tutes dala Uniun
b) ai pò mëte le presidënt y le consëi y po ince instësc gnì metüs
c) ai pò portè dant propostes.

Art. 11  I scric ite mëss:
a) tignì dötes les regoles dl Statut dla Uniun
b) tignì sö y daidé inant düc i laûrs che la Uniun fej
c) paié vign’ann le contribut fat fora dala sontada de düc i scric ite.

Cuarto capitel: Competënzes

Art. 12  Le Consëi tol sües dezijiuns cun plü de meses les usc, y almanco set porsones dl Consëi mëss ester dailò.

Art. 13  Le secreter se fistidiëia da scrì, da mëte jö i verbals dles sentades, da tignì l’archif y la biblioteca.

Art. 14  Le cassier se fistidiëia dl’aministraziun, al scrî sö ci che va fora y ite te cassa, al scri y paia fora i mandac firmà dal presidënt.

Art. 15  Le Consëi fej fora, n iade por dagnora, sce chi che damana dess gnì scric ite tla Uniun o nia.

Art. 16  La porsona che fej pert dl Consëi y mancia, zënza iustificaziun, a trëi sentades, vëgn sciurada fora y al nen vëgn metü n’atra.
 

Cuinto capitel: Desvalìes

Art. 17  Sön proposta dl Consëi pò le presidënt nominé soci d’onur co ne paia degun contribut.

Art. 18  Vigni müdada di articui de chësc statut pò mâ gnì fata sce trëi cherc dla sentada de düc i scric ite ô le fà.
 

Chësc statut é gnü scrit sö a Bornech ai 11 d’otober dal 1967 al numer 482 vol 19 di Ac Publics.