La domënia ai 14 de dezëmber dales 10 danmisdé él gnü tignì tla biblioteca dla Scora Elementara a San Linert la sentada generala dla Union Generela di Ladins dla Dolomites olache i 5 presidënc de vigni seziun de valada y la presidënta dla Generela Hilda Pizzinini à portè dant en cört na relaziun d’ativité di ultims agn. 
Te chësta ocajiun él gnü lité le presidënt nü Nani Pellegrini da Fodom che s’à surantut l’inciaria naóta por n ann. Te chësc tëmp saràl da laorè fora na strotöra nöia dla Generela por che ara pois ester funzionala y al vare cun i tëmps.

Deache al ê gnü fat fora che la Generela dess avëi na rapresentaza te vignöna dles trëi provinzies olache la Ladinia se sleria fora, él ince gnü metü dui vize-presidënc: Fabio Chiocchetti de Fascia por la provinzia de Trënt y Egon Vinatzer por la provinzia de Balsan!

14 de dezëmber 2003

La domënia ai 11 de mà dl 2003, en ocajiun dla festa dla uma, el gnü tignì n conzert cun la partezipaziun dl Cor Kèrygma, dl Cor di mituns d’Al Plan y dl grup Kyrios tla Ciasa J.B. Runcher a San Linert. Tratan la manifestaziun él stè Tone Gasser da San Martin che à lit dant rimes dedicades a süa uma y a dötes les umes dl monn. Carla Declara da Calfosch à portè na testimonianza importanta che ara à vit y vir sciöche uma: dessigü à düc i presënc ponsè sura cî che ester uma ô dì!

11 de mà dl 2003

La domënia ai 30 de novëmber 2003 él gnü presentè tla dlijia da San Martin cater publicaziuns nöies, dades fora dala Uniun di Ladins:
Le „Saltier“ – liber di salms é gnü presentè tratan i „Öspi da festa“ organisà por che düc i presënc ala manifestaziun podess odëi co che le liber di salms pò gnì adorè tla liturgia o ince ma te ciasa. Le vësco Wilhelm Egger ti à te chësta ocajiun surandè le liber a düc i presidënc di Consëis de Cöra dla Val Badia y insciö ince simbolicamënter ales comunitês dla valada. 
Tratan la manifestaziun él ince gnü presentè le „Lezionar dles domënies y di santus por l’ann C“ che contëgn dötes les letöres, i vagnì y i tesc da mëssa che podarà gnì adorà tla zelebraziun dles santes mësses tratan le 2004.

Le pice sföi cun döes novenes a onù de Sant Ujöp Freinademetz y la mapa cun cianties por vigni ocajiun por i cors de dlijia dla Val Badia é ince gnüs partìs fora te chësta ocajiun.

30 de novëmber 2003