Ai 10 de dezëmber él gnü presentè tl Istitut Ladin „Micurà de Rü“ a San Martin le CD nü dal titul „Vëia de Nadè“. Les ćianties tutes sö da Christine y Johanna Trebo y da Maria Kostner, dötes trëi da San Martin, adöm cun so maéster de musiga Bruno Rives, ti é atira jüdes a cör ales passa 200 porsones rovades adalerch ala presentaziun. Les jones che formëia le terzet „Trëi Usc“ vëgn fora de families musicales por tradiziun y insciö à inće ëres dagnora albü ligrëza da ćiantè, bele da piceres insö. Sciöch’al é gnü splighé tratan la presentaziun, vàres ëres der cer’ val’ n pü’ cuntra tendënza, ćiantan por ladin impéde che por ingleje. Mo chësc fat alza fora ćiamò deplü la ligrëza che ëres à cun so lingaz y la valüta che ares ti dà. Cun usc fines y sigüdes é les trëi jones bunes da trasmëte n sentimënt vì y sot che passenëia te nüsc paîsc y te nostes ćiases y che dëida cherié chël’atmosfera da Nadè ch’an sënt tres demanco.
Le Cd „Vëia de Nadè contëgn 14 ćianties popolares y dui toć stromentai. La maiù pert dles ćianties é gnüdes scrites da Bruno Rives, che à ćiafè tl grup Trëi Usc les ćiantarines ideales por sües composiziuns.

En gaujiun dla presentaziun à i editurs dl Cd, l’Istitut Ladin Micurà de Rü y la Uniun di Ladins dla Val Badia, albü l’ocajiun de rengrazié les ćiantarines por so impëgn y por la bela iniziativa, le maéster de musiga Bruno Rives che à te chisc agn bele portè a fin deplü proieć musicai de suzès y le stüde de registraziun Davide Records por süa disponibilité y profescionalité. Le Cd é da ciafè ćina Nadè tla sënta dl Istitut a San Martin de Tor.

En domënia, la pröma d'Advënt, él gnü tignì a Pidrô tl Salf Laûr Protezionè "La Spona" indô le marćé da Nadè che tira adalerch vigni ann tres deplü jënt, dantadöt families cun mituns. Sön marćé tomâ tl edl dantadöt i produć d'arjila gnüs fać dai jogn d'La Spona cun l'artista Irina Tavella: copes, löms, inzenjares, cianês dl Bambin y d'atres massaries. I banć dl marćé ê implis fora scialdi da laûrs fać tl salf a Pidrô: tapeć, massaries de lëgn: ćiadins, copes y patüć da fà la belëita, chedri y chertes da Nadè, gherlandes d'Advënt, laûrs creatifs cun lignan vedl y ornamënć de vigni sort. Döt cant se tolô fora dër bun te n bel ambiënt olach'an podô rodè da n stond al ater y olache i artejans lezitënć dla Spona podô odëi sciöche sü produć gnô aprijà y cumprà.

Bele por le secundo ann ti él gnü dè ala Uniun di Ladins dla Val Badia na lerch da mëte fora sües publicaziuns. La novité de chësc ann ê la presentaziun de döes CDs cun stories por mituns che ti plej dessigü inće a jënt plü de tëmp. Sön chëstes CDs él set stories da aldì fora de libri bele publicà i agn passà. Les stories, gnüdes scrites en pert y adatades da Tone Gasser, vëgn cuntades da Barbara Mühlmann, Annamaria Zingerle, Bernardetta Nagler, Eduard Zingerle, Konrad Comploi, Cristina Rubatscher y Angela Castlunger. Les usc é gnüdes registrades da Hubert Pezzei deperpo che les musighes é gnüdes componüdes y aranjades da Alessandro Trebo, cherian n'atmosfera olache i mituns y i ascutadus po se vire ite tl ambiënt dles stories. Cun de vigni sort de sonns y de veres vëgnel daidé la fantasia da s'imaginé ći ch'al vëgn cuntè.
Al vëgn cuntè dl monn ladin sciöch'al ê dan da cincant'agn, di mituns che jô a vardè y a patrun, dla religiosité dla jënt dalaôta, de tiers, de stries y i.i. Le fin de chëstes stories é inće chël de portè dant la richëza d'espresciun che nosc bel lingaz à y ch'al vëgnes mantignì inant. 
Por la presentaziun dles CDs che vëgn venüdes adöm cun i cater libri che alda laprò, te na scatora dessignada da Michael Moling, él gnü portè dant cun n pice teater l'ultima pert dla storia dl müsc Sabrina da pert di jogn assistis dla Spona. Le teater é dër garatè por l'impëgn di jobleri y de Konrad che i à insigné jö.

En mercui, ai 29 de messè, él gnü tignì tla sënta dl Istitut Ladin y dles Uniuns Culturales Suracomunales a San Martin la riuniun anuala di cronisc dla Val Badia che cöi adöm y scrì sö les informaziuns che vëgn publicades tl liber de cronica “Sas dla Crusc”. Por la Uniun di Ladins che da fora le liber él stè na buna ocajiun por rengrazié i cronisc y chi che dëida de so laûr, por recordè düc chi che sostëgn l’iniziativa – l’Assessorat por la Cultura Ladina, i comuns dla Val Badia y la Cassa Raiffeisen dla Val Badia – y por baié fora n valgönes chestiuns che reverda la publicaziun. Danter l’ater él gnü recordè ciamò n iade che la publicaziun é oramai rovada al limit cun les plates – en chësc ann nen n’êl indô passè 600 – y porchël messaràn ti agn che vëgn ciarè ciamò deplü de valuté ci informaziuns mët ite y ciünes nia. 
Pro les ultimes ediziuns ti él gnü dè tröpa lerch ales ativitês dles uniuns culturales, soziales y sportives, ince chi iadi che ares â ma na ativité ordinara da mostrè sö. Tl dagnì gnaràl ma plü publiché informaziuns che reverda les ativitês straordinares y les novitês, por che la cronica “Sas dla Crusc” ne devëntes nia na racoiüda dles croniches internes de vigni uniun. Interessant fossel ince da ti dè plü lerch ai aspec demografics de vigni comun, ales ativitês dles aministraziuns comunales, ai seturs dl’economia, ai mudamënc tl ciamp dla religiun y dla fede, ai mudamënc dl tëmp y dles temperatöres y i.i. Dl ater vers él gnü dit da plü perts de lascè demez manifestaziuns y iniziatives che à ma püch da nen fà cun les comunitês de nüsc paîsc, sciöche por ejëmpl i concursc de “Miss Italia”...