Momënc particolars tla vita da vigni de
13 de pices brosciüres che ti dá a geniturs impulsc da esperimenté la presënza de Chël Bel Dî tla vita da vigni de.
Geniturs se dejidrëia che la benedisciun de Dî acompagnes sü mituns sön so tru dla vita y
magari ó ince ëi se sintí portá da Chël Bel Dî y daidá te süa misciun da educadus, che n’é
dessigü nia saurida. Siur Tone Fiung, assistënt spiritual por les families, vëiga ti rituai na
chance da crësce deboriada, da se svilupé, da sintí proteziun y da partí le sentimënt che
geniturs y mituns toca adöm. I rituai é n’ocajiun da vire deboriada i bi momënc tla vita da
vigni de y da superé adöm les dificoltés.
Insciö á siur Tone Fiung metü adöm 13 de pices brosciüres, liades adöm te na picera scatora
cun chisc temesc:
- Buna nöt, dorm saurí: Na picia oraziun, na storia o le sëgn dla crusc söla frunt pó ester n ritual dla sëra che ti dá ai mituns segurté y proteziun.
- T’es mi fi amé: Tres le bato ciafa i geniturs por so möt o süa möta l’impormetüda da Chël Bel Dî de n amur zënza condiziuns. An pó festejé deboriada le recort dl bato, ince cun impié la ciandëra…
- La benedisciun de Dî sides cun te: I podëis ti mëte sö la man a üsc mituns, perié la benedisciun y ti audé le bun. I mituns sënt proteziun y chësc dëida capí l’amur de Chël Bel Dî.
- Prёibel pordóneme: Vijiné indô fej bun. Mo do n conflit ól ester n ritual de reconziliaziun, por che le tëmp de descordia pois gní stlüt jö y desmentié.
- Domёnia: Chёl Bel Dî á benedí le setimo de y l’á insciö fat n de sant. La domënia é importanta por palsé y por partí deboriada tëmp.
- Vёia de Nadé: I festejun la nasciüda de Gejú y al nes sá bel da partí chësta ligrëza te familia.
- Trёi Resc / Santaguania: I benediun nostes ciases y abitaziuns, i sfomentun i locai cun inzёnsc y se damanun la benedisciun.
- Alleluia, Gejú vir: I se recordun dla pasciun y mort y dla ressoreziun de Gejú. Insciö sciöche ёl é ressorí, podunse ince nos ressorí. Incёr la festa de Pasca conesciunse tröpes de beles usanzes.
- Perié te familia: Perié o dí ester en relaziun cun Chël Bel Dî. Perié deboriada cheriëia comunité y por podëi integré tla vita da vigni de le perié cun i mituns pól ester d’aiüt porté ite n ritual.
- T’es n tesur: Al é de beliscimi momёnc, plёgns de benedisciun tla vita da vigni de, olache geniturs y mituns sёnt “I aldiun adöm!”. Porchël vál propi datrai debojёgn da lascé por n momënt ci che an é tl laur de fá por ester chiló un por l’ater y se scinché tëmp.
- Chirí la pesc: N iade al de se tó tëmp, por s’archité, por palsé, por jí te se instësc, por ester susc – de te momënc é preziusc.
- Bun apetit! Al é important por i mituns da se senté adöm pro mёsa y mangé deboriada! La oraziun pro le past pó ester n ritual che liëia la familia y nes recorda che döt le bun vëgn da Chёl Bel Dî
- I te diji dilan: Sëgns de respet y amur fej bun. Tla vita da vigni de él tröpes ocajiuns por dí „dilan“ .
La Uniun di Ladins dla Val Badia á fat avëi n esemplar dla publicaziun a vigni familia cun de
pici mituns, cun l’audanza che i rituai dëides les families a ester n post da sté saurí.
Al ti vá n gran dilan a Marlis Frenademez Crazzolara che á fat la traduziun tl ladin, a Tone
Gasser por la sistemaziun dles cianties, al’UML por la metüda a desposiziun de n valgönes
cianties, a Annamaria y Tone Fiung adöm ala Diozeja da Balsan-Porsenú por la buna
colaboraziun.
I sun daimpró al de dla vita, olache tles dlijies de tröpes ploanies s’incunta les families por la
benedisciun di mituns: “Na bela ocajiun por le “grup de laur por families” da partí fora la
scincunda!”, dij siur degan Iaco Willeit.
Ann de publicaziun 2017
in colaboraziun cun la diozeja da Bulsan
13 de pices brosciüres
Lingaz: ladin
Prisc: debann
por comané la publicaziun info@uniunladins.it