Chë Klexia é na picia stria inteliënta y coriosa che ne vëiga ignó l’ora da descurí le monn. Mo baldi n’é les gran stries nia a öna canch’ara ó ince ëra tó pert al bal dla nöt de Walpurga – cun sü 127 agn éra pö trö massa jona. So carater ardí y so ce dür la porta porimpó a ignoré les regoles dles gran stries. Finamai so bun compagn, le corf Abraxas, ti dejaconsiëia da fá do so ce, mo Klexia tol süa granara y raita sön Börz a balé.
Ara vëgn indere brincada dala stria dl tëmp Mëda Rumpumpel y la cossa gauja sambëgn n gran sciosciüre. Ma bun che la Gran Stria Suspizia é clemënta y le castighe é valgamia pice: ara mëss dé jö süa granara! Ci fortüna por Klexia!
Tratan ch’ara vá a pe do n tru lunch y sfadius cuntra ciasa, incuntera la roza Gardinia, che incorajëia cun entusiasm les idees de rebeliun de Klexia. Insciö vëgn Gardinia tuta sö sciöche compagna nöia te ciasa de Klexia. Abraxas n’á indere degöna ligrëza cun chësta dezijiun. Mo Klexia ó sëgn a vigni manira deventé na buniscima stria – ma insciö podarára jí sön Börz a balé cun les gran stries.
I mëisc passa y chë picia stria stüdia so liber da stries cun gran lezitënza. Cun vigni buna opera ch’ara fej, sëntera ch’ara deventará tosc na buniscima stria. Ara ne döra nia dî ch’ara se sënt ince arjignada da dé jö le gran ejam dan le consëi dles stries. Mo chëstes é sciocades y se dessëna dër da aldí dles bones operes de Klexia, che ne capësc nia porciodí. Fina che Rumpumpel ti spliga che na dërta stria …dess fá dl mal! Klexia ne se stá nët nia bëgn y se ciafa finamai na dramada da chël tlap de stries salvaries.
Mo a chë picia stria ne ti falel no la snait no l’astüzia. Insciö ára tosc n plann por ti la cacé zoruch ales gran stries y ti mëte insciö na fin a sües stupidades tan crödies.
Video dl musical „Chë picia stria“
de Claudia Gerstl y Martin Telser, dezëmber 2023
Prisc: 15.00 €