En gaujiun dl curs por conduturs y conduturies dla zelebraziun dla Parora de Dî, gnü tignì por le decanat dla Val Badia l'ann 2008/09, àn odü tan ch'al ogass n liber por ladin da ti dè tles mans a chi che surantol chësc sorvisc liturgich. Porchël él gnü ponsè da pert dla Uniun Ladins Val Badia a na traduziun dl liber todësch „Wort-Gottes-Feier. Werkbuch für die Sonn- und Festtage“ gnü dè fora dai vëschi di paîsc todësc.
La zelebraziun dla Parora de Dî é na funziun de dlijia por la comunité, bele preodüda dal Secundo Conzil Vatican, che é gnüda n pü' strascurada ćina incö, mo che gnarà tres plü atuala en previjiun dla manćianza de proi tl dagnì. Tles ploanies olach'an ne sarà nia plü n prou da ciafè por la mëssa dla domënia y dles festes, vëgn les comunitês inviades da se abiné impò regolarmënter te tlijia incër la mëssa dla parora. Chësc liber, che é gnü traslatè da Tone Gasser y ćiarè jö da siur Iaco Ploner y da siur Ulrich Fistill y che contëgn na introduziun dl vësco Karl Golser, dà tla pröma pert indicaziuns coche na zelebraziun dla Parora de Dî dess gnì festejada. Tla secunda pert contëgn le liber atlamaziuns, oraziuns, inns, laudes y supliches por la zelebraziun.
Implü él da ciafè tl liber deplü composiziuns musicales, componüdes da Iarone Chizzali, por ćiantur/ia, cor y comunité. Le liber à 225 plates y é n gran arichimënt por la liturgia ladina y por la cultura ladina en general.
Ann de publicaziun 2010
Parores de Tone Gasser
225 Plates
Lingaz: ladin
Prisc 30.00€